Alegoreza w Paschale carmen Seduliusza

In introductione (I) auctor Paschalis carminis primum praesentatur (1), deinde allegoriae notio (2) eiusque species nec non usus in antiquitate ethnica et christiana exponuntur (3). In secunda autem commentationis parte (II) omnes allegoriae, quae in Paschali carmine Sedulii inveniuntur, afferuntur et accurate investigantur. In tertia demum parte (III) conclusiones deducuntur: Bibliae interpretationes allegoricae, quae in Paschali carmine Sedulii Caelii inventae sunt, ad gentiles diriguntur; pagani optime eruditi doctrinam christianam saepe iam exacte sciebant et Paschale carmen Sedulii eiusque allegoricas interpretationes biblicas intellegere poterant; explicationes spirituales in sensu mystico et typico rhetoricae artis litteratis blandimento erant; allegoriae Sedulianae pulcherrimae esse videntur et perplacebant fortasse gentilium lectoribus prudentibus, qui orationis virtutes colebant et facilius ad fidem imbui ac voluntarii adquiri Deo poterant.